Islamabad United v Quetta Gladiators

Islamabad United 134/7(20 OVERS) - 135/4(17.1 OVERS) Quetta Gladiators
28 Feb 2018 - 09:00Sharjah

پاکستان سپر لیگ کے نویں میچ میں کوئٹہ گلیڈی ایٹرز نے اسلام آباد یونائیٹڈ کو شکست دے دی۔ 

شارجہ میں کھیلے گئے پاکستان سپر لیگ کے نویں میچ میں اسلام آباد یونائیٹڈ نے پہلے بیٹنگ کرتے ہوئے مقررہ 20 اوورز میں 134 رنز بنائے جس کے جواب میں کوئٹہ گلیڈی ایٹرز نے مطلوبہ ہدف 18ویں اوور میں 4 وکٹ کے نقصان پر پورا کرلیا۔

کوئٹہ کی جانب سے اسد شفیق اور شین واٹسن نے اننگز کا آغاز کیا رومان رئیس نے تیسرے اوور میں شین واٹسن کو 2 رنز پر آؤٹ کیا لیکن بدقسمتی سے وہ نوبال قرار پائی جب کہ اگلی ہی گیند پر والٹن نے شین واٹسن کا ناقابل یقین کیچ پکڑا مگر وہ فری ہٹ ہونے کی وجہ سے آؤٹ نہیں ہوئے مگر وہ اگلے ہی اوور میں 13 رنز بنا کر اسٹیون فن کا شکار بن گئے۔

تیسرے نمبر پر بیٹنگ کے لیے آنے والے عمر امین بھی صرف 6 رنز کے مہمان ثابت ہوئے ، انہیں محمد سمیع نے بولڈ کیا جب کہ اسد شفیق 22 رنز کی ذمہ دارانہ اننگز کھیل کر فن کا نشانہ بنے۔ کیون پیٹرسن اور محمد نواز نے چوتھی وکٹ کے لیے 70 رنز کی شراکت داری قائم کی اس دوران کیون پیٹرسن نے 3  بلند وبانگ چھکے بھی مارے۔

دونوں کھلاڑیوں نے ذمہ داری کا مظاہرہ کرتے ہوئے اسکور بورڈ کو آگے بڑھایا مگر بدقسمتی سے کیون پیٹرسن 2 رنز کی کمی سے اپنی نصف سنچری مکمل نہ کرسکے اور 48 رنز پر فن کا شکار بن گئے۔ 

اس سے قبل کوئٹہ گلیڈی ایٹرز کے کپتان سرفراز احمد نے ٹاس جیت کر پہلے اسلام آباد یونائیٹڈ کو بیٹنگ کی دعوت دی۔ لیوک رونکی اور چاڈوک والٹن نے اننگز کا آغاز کیا مگر انور علی نے تیسرے ہی اوور میں والٹن کو پویلین واپس بھیج دیا وہ 10 رنز بناسکے۔ 

تیسرے نمبر پر بیٹنگ کے لیے آنے والے آصف علی بھی صرف 6 رنز کے مہمان ثابت ہوئے ، انہیں راحت علی نے کلین بولڈ کیا۔ رونکی نے جے پی ڈومینی کے ہمراہ تیسری وکٹ کے لیے 41 رنز کی شراکت قائم کی، ڈومینی 14 رنز بناکر آؤٹ ہوگئے جب کہ رونکی کی اننگز 43 رنز تک محدود رہی۔

پی ایس ایل تھری میں اپنا پہلا میچ کھیلنے والے اسلام آباد یونائیٹڈ کے کپتان مصباح الحق نے 22 رنزبنائے، انہیں شین واٹسن نے آؤٹ کیا۔ آل راؤنڈر فہیم اشرف نے جارحانہ اننگز کھیلتے ہوئے 13 گیندوں پر 21 رنز کی اننگز کھیلی مگر وہ رن آؤٹ ہوگئے۔

ٹورنامنٹ میں کراچی کنگز 6 پوائنٹس کے ساتھ پوائنٹ ٹیبل پر سب سے اوپر ہے اور ملتان سلطان 4 پوائنٹس کے ساتھ دوسرے نمبر پر ہے جب کہ لاہور قلندرز کو اپنے تینوں میچز میں شکست کا سامنا کرنا پڑا۔